Өстәл теннисы – ике яки ике пар уенчының ракетка белән уен өстәлендә бер-берсенә туп сугудан гыйбарәт спорт уены, төп максаты – тупны көндәш кире кайтара алмаслык итеп сугу.
Бүгенге көнгә кадәр бу уен кайсы илдә уйлап табылуы сер булып кала. Кайбер тарихчылар ракетка һәм туплы уен Англиядә барлыкка килгән дип уйлый, ә кайберләр исә уен тарихы Азиядә – Кытай һәм Япониядә башланган дип раслый.
1926 елда Халыкара өстәл теннисы федерациясе оеша. Әлеге спорт төрендә чын революция 1930 елда, уенда резина белән тышланган ракеткалар куллана башлагач була. 1988 елдан башлап өстәл теннисы – Олимпия спорт төре.
Хәзерге вакытта Халыкара өстәл теннисы федерациясе үз эченә дөньяның бар почмагыннан йөз туксаннан артык милли ассоциацияне ала.