Каратэ – япон көрәш сәнгате, коралдан башка кул белән сугышу системасы. Әлеге спорт төре XV гасырда Окинава утравында үсеш ала башлаган, ә XX гасыр башында бар Япониягә таралган. Көрәшчеләр бер-берсенә мөмкин кадәр азрак кагылырга, әмма көндәшнең гәүдәсенә кул һәм аяклар белән төгәл итеп сугарга тырышалар.
Каратэның халыкара спорт көрәшенә әйләнүе XX гасырның уртасына туры килә. 60 еллар башында Азия, Европа һәм Американың кайбер илләрендә каратэ буенча милли федерацияләр оеша. 1980 елдан башлап, даими рәвештә, ике елга бер тапкыр дөнья чемпионатлары уза башлый.
1993 елда Бөтендөнья каратэ федерациясе (WKF) оеша – ул каратэны Олимпия хәрәкәтендә тәкъдим итү, шулай ук аны бар дөньяда үстерү өчен Халыкара Олимпия комитетыннан рәсми вәкаләтләр алган бердәнбер оешма. 2016 елда каратэ Токиода узачак Олимпия уеннары-2021 программасына кертелде. 2018 елда әлеге спорт төре беренче тапкыр Буэнос-Айреста узган яшүсмерләр Олимпиадасында тәкъдим ителде.
Хәзерге вакытта WKF әгъзасы булып үз илләре территориясендә каратэны җәелдерүче 191 милли федерация санала, әлеге төр белән 100 миллионнан артык балалар һәм олылар шөгыльләнә.