Бию спорты – алдан сайланган музыка астында тиешле ритмга һәм эзлекле рәвештә хәрәкәтләр һәм элементлар ясаудан гыйбарәт спорт төре. Аның башка атамалары да бар: "бал биюе", "спорт биюе".
XX гасыр башында төрле бал биюләре барлыкка килү белән, аларны стандартлаштыру һәм системалаштыру зарурлыгына ихтыяҗ туа. Бу бию спорты барлыкка килүдә һәм аның үсүендә беренче адымнар була. 1926 елда Англиядә бал биюләре халыкара стандартларының беренче кагыйдәләре формалаша һәм аларны башкару техникасы системасы булдырыла. Һәвәскәрләр арасында беренче дөнья чемпионаты 1936 елда Германиядә уза.
Әлеге спорт төре буенча халыкара оешма булып дөньяның 92 илендә һәм биш континентында төрле бию юнәлешләрен үстерүче Бөтендөнья бию спорты федерациясе (WDSF) тора. Халыкара Олимпия комитеты рәсми рәвештә бал биюләрен спорт төре итеп 1997 елда таныды.
2018 елда Аргентинада III Җәйге яшүсмерләр Олимпиадасы узды, аның программасына беренче тапкыр брейкинг кертелде. 2019 елда Халыкара Олимпия комитеты брейкингны 2024 елда Парижда узачак Олимпия уеннарының ярыш программасына кертүне хуплады.